《爸爸去哪兒》話咁快就播咗一大半，當各個萌娃愈來愈熟悉，之間的互動愈來愈好睇的時候，大家真係要好好珍惜接下來的集數。有追開《爸爸》的各位都知道，陳小春由第一集開始已經對小泡芙情有獨鍾，不時都會美言小泡芙幾句，當正佢係親生囡咁，終於係前幾日，小春得償所願可以大抱小泡芙。

最近因為《爸爸去哪兒》與陳小春再遇的劉畊宏，在微博post咗張全家探班的相，內文就提到：「從同一個唱片公司，《頭文字D》到現在快20年了，真巧陳小春就在我們家附近拍電影。我們全家跑來探班，還讓王婉霏遇到學生時期喜歡的鄭伊健，不知她學生時期是否也喜歡過我？」最重要的當然係見到陳小春站雙手攬實小泡芙，好隱晦咁忍住笑，唔通對過往對小泡芙的愛護，埋伏黑暗不見光？定係又怕老婆話錫小泡芙多過錫Jasper，所以自己執生。

呢輯相的大彩蛋當然係鄭伊健，甚少使用社交網絡的伊健竟然出現係劉畊宏微博，見到伊健一頭長髮再配埋一套型爆的西裝，不減當年風采。查實陳小春與劉畊宏都曾參演電影《頭文字D》，分別飾演須藤京一以及佢嘅拍檔岩城清次。當時挑周杰倫機，係秋名山上賽車，絕對令大家留下深刻的印象。