當年TVB嘅節目《美女廚房》，發掘唔少女藝人原來係隱世廚藝高手，亦有唔少地獄廚神誕生，其中一位就係G.E.M.鄧紫棋。當年G.E.M.煮咗一道腥味十足嘅魚旦，令主持及嘉賓反胃，結果鄧紫棋三個字被冠上「新一代地獄廚神」之名。事隔8年佢嘅廚藝有無進步就未知，不過呢日就差啲攪到火燒廚房！

2009年當時只得18歲嘅G.E.M.，到TVB節目《美女廚房》擔任嘉賓，切魚肉打魚蛋時一見魚血即狂嗌，又被魚骨拮到手，煮魚蛋時又令鍋內翻起白泡。G.E.M.完成菜式後自己試味，見她入口即吐兼大嗌救命。而佢嘅fans品嘗後雖然大讚好味，但轉身即狂奔到廁所。主持之一嘅方力申食完即詩興大發，將鄧紫棋嘅名「G.E.M.」戲稱為「Get Everyone Moving to the trash」，以取笑她的劣等廚藝。

事隔8年後，G.E.M.最近參與謝霆鋒節目《鋒味》做嘉賓，佢喺4號晚上載一條短片，見到佢身穿白色上長袖衫頭戴冷帽，攝高衫袖努力炒蛋。片段一開始，鏡頭外嘅工作人員就用國語問G.E.M.：「油濺到你了嗎？」G.E.M.仲故作輕鬆話：「還沒，我不是說沒。」話口未完就聽到火警鐘狂響，G.E.M.即時嚇到大嗌，而攝影師亦放低手上部機唔再錄影。G.E.M.上載呢條短片並寫上：「明天要煮蕃茄炒蛋給霆鋒吃，所以今晚我在練習⋯結果炒蛋能炒到火警警報鐘響⋯我也是挺厲害的⋯」仲加上Hashtag地獄廚神又出動。網友估計G.E.M.應該係唔記得開抽氣扇，令廚房積聚太多煙令火警警報響起，以後真係要小心啲啦。