吳業坤 (坤哥) 的手文之誤出名嚴重，仲成日爆出唔少笑料，不過亦因為咁而令他的一句「食好西」成為了潮語，可以話是他的「代表作」，基本上現在有人一講「食好西」就會即刻諗起坤哥。當大家仲用緊「食好西」的時候，坤哥原來已經玩埋英文版，更將他這句金句設計成圖案推出了自家出品的衛衣，做埋Designer，真係估佢唔到呀。

坤哥日前代表有份主演的無綫劇集《誇世代》為節目《我愛EYT》進行綵排時，就穿上了一件印有「EAT GOOD WEST」白色字樣的黑色衛衣，相當Sharp醒。其實坤哥去年底已經染指時裝界，與朋友合資開設西裝店，相信他對有關fashion方面都好有興趣。咁坤哥又是否想做埋fashion designer呢？他說：「一直都想試多啲嘢，咩都試下咁，向多方面發展。」他晚上還穿着這件衛衣去睇農夫的Concert撐好友場。有網民就好buy坤哥今次親自設計的這件衛衣，留言話好有型，好想買件來着。唔知坤哥遲些可會推出市面發售呢？不過都有網民話坤哥直譯食好西的英文笑死人，驚啲外國人唔知點睇香港人的英文水平。

香港01記者就電話訪問了坤哥，各位想買這件衛衣的朋友要留意喇，原來件衛衣真係有得賣㗎，大家到時可以着住去食好西喇。坤哥話：「預計賣$300-$400蚊左右，推出幾多件就睇反應啦。」咁坤哥係咪想做埋時裝設計師呢？「都會想自己玩下囉，我覺得可以自己着呀，送畀朋友呀，係為咗開心囉，而唔係諗賺錢嘅。玩啲funny嘢，未必係fashion嘢。除咗呢件衛衣，我哋仲出咗頂綠帽，啲設計係我同一個朋友一齊去諗，我諗少少點子出嚟，咁佢就去實行呢件事出嚟，因為佢係做開design嘅。驚畀外國人笑？我覺得又唔使諗咁多嘢喎，做自己鍾意做嘅嘢囉。同埋主要都未必係做畀外國人㗎嘛。」