昨晚TVB台慶亮點應該非馬國明莫屬喇，又跳舞甩beat，又要壯烈犧牲同阿Bob激嘴，最後仲要做返招牌動作「天然呆」，令到不少網民及觀眾都爆笑，我認為明年1月底嘅台慶頒獎禮真係要頒嗰獎俾馬明！而昨晚馬明出席完台慶之後，今日淩晨1點都繼續在Facebook同粉絲開live傾計，仲解釋埋點解跳舞跳到甩晒beat,「本身我係內地做緊嘢，同公司講要今日下午先返到TVB，而我經理人亦向公司講唔好安排咁多舞步俾我，點知之後我收到風原來我有好多step，變左即刻改機票，今朝即刻返黎排，但始終太少時間。其他藝員都排咗好耐，我就半日，比較曳啲。」馬明之後仲笑言自己無乜跳舞天分，「如果可以帶俾觀眾歡樂都無咩所謂，笑下幾開心！」

其實今次都唔係馬明第一次跳舞被網友討論，早在2004年身為「奥運六星」嘅馬國明（綠色衫）都有邊唱《遇強愈勇》邊跳舞，都睇得出馬明係跳舞方面係要加把勁，所以大家唔好笑佢喇！今次Live除了講點解跳舞甩beat之外，都有同粉絲一齊討論下劇集《降魔的》嘅劇情，仲話劇集今個星期已經進入結局篇，另外主持人亦提到原本以為《降魔的》係一套純賣搞笑膠劇，點知原來係非膠劇，引來有好多各大討論區嘅網友都十分支持馬明會奪視帝，馬明之後都有回應,「首先各大討論區咁撐我地《降魔的》，我覺得一個戲最好係笑中有淚，唔係話唔好笑，但笑完無乜嘢，觀眾共鳴會細啲。但如果笑完可以有種message帶到俾觀眾，我相信會更加可以係觀眾心中留下一個印象。」佢表示咁多觀眾鍾意《降魔的》已經係一個獎,「我比較簡單啲。如果浩信拎我都好開心，因為佢都係好好朋友，展鵬阿蕭拎都會好開心，我最希望《降魔的》可以拎到最佳劇集！」而近期忙於係上海拍緊電影嘅馬明仲預告埋明年嘅動向,「《宮心計》預計會係出年3-4月會播，但其實我出年年頭就會返TVB拍劇，雖然咩劇就未定唔可以講住。」