【降魔的】啤啤有為一晚死晒　劉佩玥：我做親嘅角色都冇好下場

《降魔的》進入結局篇，晚晚都有主角死，令到一班降粉非常傷心，先有龍貓（何遠東飾），已大派洋蔥，昨晚更一集死兩個，分別是有為（蔣志光飾）和啤啤（劉佩玥飾），蔣志光因為和魔（黃智雯飾）大戰而被電死，全身燻黑，死得有點突然，加上未回魂，所以不太催淚，但依照《降魔的》套路，應該今晚回魂，當時洋蔥價位上升，但啤啤死就不得了......

啤啤為了救小馬，最後焗死在小馬的車尾箱，死前還有情深說話未曾講，認真淒美，導演還驚未夠洋蔥，尾段更輯錄啤啤和小馬的經歷，再以胡鴻鈞的《遙不可及》作墊底，落重洋蔥，又是時候拿紙巾，其實劉佩玥自己都覺得啤啤下場好慘，她說：「我睇劇本嗰陣已經喊，我都算係天煞孤星，我啲friend尋晚都勁send message 俾我，話我做親嘅角色都冇好下場，有啲都要死，可能咁樣觀眾會留下深刻印象，《殭》我就自己服毒自殺，《幕後玩家》我就殺咗翠如，之後我又好慘，今次又俾魔害死，咁大家鍾意睇，其實對我好大鼓舞。」