杜德偉赴韓國出動10套私伙衫拍 MV　邀 MJ家族成員世紀合唱

杜德偉（Alex）最新浪漫主打歌 《妳在我的愛情裡》MV 今天正式面世，今次 MV 對 Alex 而言可謂極具意義，除了請來有份合唱的 Michael Jackson 家族成員、美國唱作小天王 B.Howard 演出外，更破了 Alex 事業生涯上的兩大紀錄－最長拍攝時間及最多換裝次數！

連續25小時通宵拍攝



Alex 今次拉大隊遠赴韓國取景拍攝，由當地攝製團隊操刀，為了追趕進度，更連續 25 小時通宵拍攝，他說：「係我拍過咁多MV，拍得最長時間嘅一個，我發現每次同韓國導演合作，拍嘅時間都會特別長。仲記得拍到最後一個鏡頭，係我哋喺架開屏車上睇夜景，當時大家都超攰，但韓國團隊好專業，其中一個製片後生仔，好努力咁用身體語言帶動我哋車上演員嘅情緒，令我哋即刻精神返晒。」



雖然 Alex 捱眼瞓拍攝，不過卻無阻他將 MV 變成個人 Fashion Show，短短在4分鐘的 MV 裡，已換超過10套靚衫，而且每套衫都是出動私伙：「因為我好鍾意時裝，所以由出道到依家開始，對自己造型已經好有睇法，記得第一張唱片《只想留下》個封面，由背心去到皮褸、牛仔褲都係自己襯，每張唱片都想參與，咁先保持到自己百分百風格。」Alex又指在《妳在我的愛情裡》不斷換裝其實帶有特別意思：「呢首歌係講緊一段經過長時間沉澱落嚟嘅愛情，同我依家人生階段好吻合，所以今次MV換得特別多衫，想用好多套衫嚟代表經歷咗一段好長嘅時間。」
 


似與偶像 MJ 合唱

眾所周知，Alex 是已故巨星 Michael Jackson （MJ）的頭號粉絲，今次 MV 竟找來 MJ 家族成員 B.Howard 破天荒合作。原來二人甚有淵源，早在 2009 年 MJ 過世時，Alex 為偶像在港舉行追思會，當時並透過黑人朋友介紹下結識到 MJ 家族成員：「當年 B.Howard 都有嚟到香港，我同佢去咗探訪孤兒園、主題公園玩，之後都有一直保持聯絡。我覺得佢好可愛，同埋真係好似 MJ，無論身體比例都係手長腳長、講野表情，仲有特別係佢把聲係最似。而今次透過呢首歌，令我好似同我偶像合唱，我覺得係一件好精彩嘅事！」



而 B.Howard 為撐 Alex 可謂出心出力，特意由美國飛抵韓國拍攝 MV，落機後便要匆匆趕到片場拍攝，二人在短時間內拍攝遊車河睇夜景、玩煙火等鏡頭。Alex 憶述：「佢當日好辛苦，一落機就要埋位，喺片場沖涼換衫。同埋佢真係帶比我好多豐富嘅經驗，因為佢介紹咗我認識『格林美』級數嘅音樂幕後團隊，促成嚟緊我呢隻碟每首歌都可以同唔同嘅高人合作。」