《爸爸去哪兒5》殺青後，一班萌娃私下繼續見面，感情十分要好，而幾位老爸亦好顧及觀眾感受，不時都會透過微博或喺其他節目分享寶貝仔女嘅 事。就好似吳尊日前參加節目《天天向上》時，提到NeiNei曾經睇過佢舊作《公主小妹》，當睇到他同張韶涵一場接吻戲時，竟然問：「這是你女朋友嗎？」亦試過有一次睇到《專屬天使》MV，吳尊同Ella＠S.H.E錫錫一幕之後又問：「這是你女朋友嗎？」童言無忌確係幾好笑，吳尊唯有耐心解釋此乃劇情需要。「並不是真的。」其實，吳尊當年同Ella拍《花樣少年少女》時 ，多次傳出假戲真做，加上Ella之後自爆曾經戀上某男演員，估唔到NeiNei都幾有眼力！

節目中，吳尊又提到NeiNei與自己同在10月10日生日，而仔仔Max就同老婆10月11日生日。當年在產房的畫面至今仍舊記得十分清楚。「在產房時，我唯一的想法就是安全，孩子出生的那天也是我的生日，那是我最好的生日禮物。」結婚8年，雖然育有一對仔女，但吳尊就強調唔會因而忽略老婆，仲話小朋友睡覺之後就係二人世界，果然係好老公好老爸。