姊妹是，無論對方發生任何事，都隨時喺身邊一齊笑一齊哭，見到對方幸福會感動，見到對方受委屈會比佢本人更激氣更痛心。蔡卓妍鍾欣潼2000年認識至今，17年來在公在私都互相扶持，如今兩個人都搵到疼惜自己嘅男友當然值得高興，但回首往日阿嬌因為艷照風波令演藝事業陷入低潮，事隔多年喺內地節目《心路》中再提起，阿嬌表現勇敢，直到提起好姊妹阿Sa力挺時終於忍唔住喊住話：「最開心、最榮幸，最感恩的就是能認識她。」

2008年對阿嬌來說，可能係最難捱嘅一年，受陳冠希艷照門風波影響，形象大傷事業重挫，多年來亦不時被網友重提攻擊，早前阿嬌喺網上直播互動時，就有滋事分子不停提起陳冠希，令阿嬌一度垂頭不語。喺節目中阿嬌提起呢件往事雖然表現堅強，但亦不禁眼眶泛紅：「其實我沒所謂，因為這個事情已經過去了，對我來說，其他人怎麼說我也不會介意了，我還要過自己生活、走自己的路，我還要謝謝現在還支持我的粉絲。」

當年正值Twins發展高峰收成期，艷照門風波令阿嬌無法不暫時退隱，Twins所有工作亦只能停擺，亦係阿Sa單飛發展出碟嘅契機。雖然被逼暫時分開工作，但阿嬌就話當時幸得阿Sa力挺，哽咽地道謝：「她做的事情我都很感動，因為她要把所有的工作都放下，其實那個挺冒險的。最開心、最榮幸，最感恩的就是能認識她。」

Twins出道多年，一齊唱歌拍戲開演唱會，但原來從未試過合體拍攝近年內地非常流行嘅真人騷。有傳佢地去年初，以人民幣過百萬日薪，拍攝以洗滌心靈為題嘅節目《心路》，一年幾之後終於播出。節目中佢哋要交出手提電話同銀包，只得50蚊嘅情況下要上到寶蓮寺，佢哋向路人借錢，又做街頭表演，最後截得順風車送佢哋一程。阿Sa阿嬌一連三日喺寺內禪修、洗碗，仲搵到阿Sa公公親手畫嘅墨寶。