今集的《後生仔傾吓偈》主題係講青春多可愛，不過講講下就變了講現今年輕一代，尤其是90後有咩問題。主持麥明詩 (Louisa)、馮盈盈同陸浩明以及一班大學生KOL都一致認為年長一輩總對年輕一輩有好多不滿，社會仲會給予年青人不少標籤，而90後似乎更見嚴重。諸如廢青、hea爆、唔捱得、唔話得、自我中心、自以為是等等都是對90後的一些標籤，直情好似變成了90後的代名詞一樣，令同樣身為90後的他們大呼不公平。

講到他們最不喜歡聽到的批評，就是「你哋呢班90後，唉！」完全是盲目地標籤了所有90後，一竹篙打一船人呢種言論根本唔可取。不過他們都認同90後確有不少是很自我中心，覺得自己啱晒，好叻好威好同與別不同，咁樣又的確幾乞人憎。Louisa聽完後即講出了這個問題的成因：「我正正就係想講呢樣嘢，教育方法喺唔同年代有唔同嘅模式，30年前啲阿媽會鬧到仔女飛起，會叫你要努力讀書，要出人頭地，唔係第時大個咗就要執垃圾。但係依家唔係㗎喇，每個人都好叻，會同你講you are special，即係一種比較西方嘅教育模式，而個問題就係喺咁樣嘅教育下長大嘅小朋友，真係會覺得我哋每個人都係special㗎喎，當我去到一間公司入面點解我係做一啲人人都做到嘅工作？點解我唔係做話事嗰個？咁就會覺得好困惑，覺得懷才不遇，做做下就會轉工。」

Louisa果然深明家長的教育對小朋友的深遠影響，大家怪責一班90後的同時，其實是否都應該檢討一下對年輕一代的教育模式呢？講到好多長輩都成日會話90後唔捱得，Louisa亦一句KO了這個說法：「唔同年代無得比較，咁將啲長輩擺喺啲戰後嘅時代生活，佢哋亦未必捱到啦。我覺得捱唔捱得係相對嘅，人都係想不斷進步。」講得好啱呀，唔通明明30幾度屋企有冷氣都要唔開先叫捱得咩，又講話以前無得風扇都係咁啦，咁人類咪會無進步囉。