陳豪與老婆陳茵媺（Aimee）出名恩愛，四年抱三，去年4月誕下細女Camilla後，終於宣布封肚，專心照顧3個小朋友。上星期兩公婆為大仔Aiden舉辦4歲生日會，今日被發現陳豪為細仔Nathan去學校註冊，原來細仔明年入讀星級幼稚園St. Catherine's International Kindergarten！

其實香港好多家長都為了小朋友考學校而好頭痛，陳豪同Aimee都唔例外，今年多次傳出佢哋為大仔精心挑選幼稚園，有傳報讀半山區偏門猶太教國際學校，不過今日被人影到原來陳豪都有幫出年3歲的細仔去報讀熱門幼稚園，仲親身去遞交報名費。據知現場一班媽咪級fans，見到陳豪都紛紛上前合照，一向nice的男神豪當然亦有求必應，難怪佢咁受歡迎啦！據悉陳豪細仔將會入讀K1班（英普班），相信到時陳豪同Amiee成日都會送仔仔返學。St. Catherine's貴為星級幼稚園，亦吸引不少明星為子女報讀，好似陳慧琳的兩個仔仔、蔡少芬個大女等。不過相信陳豪為咗仔仔報讀好多間幼稚園，分分鐘手執多間幼稚園的Offer，到下年9月係咪真的入讀呢間幼稚園，仲言之尚早呀！