一連5集嘅《Do姐再Shopping》意大利篇，由Do姐（鄭裕玲） 帶路同農夫的陸永、C君以及蕭正楠 （Edwin） 一起到米蘭飲飲食食，不過，前晚播出一集，陸永就因為遲到，結果遭到大隊拋棄。

Do姐、蕭正楠、C君今集分別到米蘭東南部的巴馬（Parma）嘅芝士、火腿製作工場以及花市，農夫二缺一，蕭正楠理應大好機會上位，sorry，全集都係非常安守本份咁做一個評述員，反觀C君喺工場時，話完Do姐無聽書之外，又再大大聲同Do姐理論，搞到她最後忍唔住問「無陸永喺度，你而家好巴閉？」、「鬧我？你想死呀？」過程中，蕭正楠一直在旁陪笑。

去到Parma Ham工場試食時，C君大力推薦Do姐食豬腩部份，但Do姐就十分抗拒，更表示：「你鍾意食扣肉嘛，我至憎。」之後Do姐又指C君係「食得好少嘢嘅肥仔」，明顯對C君的飲食喜好十分了解，去到最後，Do姐更突然擔心起陸永，話要買份手信畀佢，蕭正楠嘅存在價值即時被比下去。