「又到聖誕~同度聖誕~」聖誕節除了睇燈飾，食下火雞，最重要嘅環節一定係交換禮物喇！而今日就係Boxing Day，大家又拆咗禮物未呢？我就拆咗喇，係冬天一定用到嘅超可愛嘅恐龍毛毛拖鞋呀！人愈大都希望可以送到一啲實用嘅禮物俾朋友，但總有一班朋友依然會送啲無厘頭嘅嘢俾人。早前就訪問了TVB幾位藝員，問下佢地有無收過一啲禮物係唔想收嘅呢？！

唐詩詠

每一年都會同朋友開聖誕party嘅唐詩詠，佢就話以前最怕交換禮物環節，因為有蕭正楠墊底，「佢嘅禮物全部都係好古怪嘅嘢，試過佢拎份擺咗30幾年嘅芝士，真係無人差得過佢呢份禮物。」她笑言雖然禮物就比較唔太實用，但就幾開心，「好期待收到佢今年份禮物，我好肯定一定係最伏，到時我一定放上網俾大家知！」

馬國明

今年嘅熱門視帝人選唔使講一定有馬國明份喇，出名慳家嘅佢係揀禮物方面都真係幾實際(p.s佢自己講架），所以唔係好想收到自己用唔到嘅嘢，「我收過一啲衣物，但唔啱size，我就會轉送或者捐俾人。」佢仲話希望收到可以讓其他人記住自己嘅禮物，「如果份禮物個個人真係可以日日用到嘅，佢一用嘅時候就會記起係我送俾佢，呢嗰係幾好令對方掛住自己嘅一個方法！」心穎BB聽到喇！

朱晨麗

一劇接一劇嘅朱晨麗近年嘅聖誕節都要工作，佢認為聖誕節係要一家人一齊整下火雞，傾下偈咁度過。所以佢都話自己好懷念以前成班同學一齊開聖誕party嘅時光，「每個人都有預備大約50蚊以上嘅禮物，你一拆可能係用唔到杯或者枕頭，但都係幾開心嘅事！」

劉穎璇

忙住拍攝劇集《兄弟》嘅港姐劉穎璇（Tiffany），相信係外國長大嘅佢以前過嘅聖誕節一定勁有氣氛，Tiffany透露交換禮物環節每人預備20蚊美金嘅禮物，好可惜佢收到竟然係一份boxer，「我開咗之後就同佢地講我應該無咩用，跟住就俾咗其他人，所以個日我係無收過禮物。」至於她預備送俾人嘅禮物就係好實用gift card，「因為gift card你去邊度都可以用到，但我就收到boxer，係有啲失望。」嘅