無綫50周年台慶重頭劇《溏心風暴3》入面飾演黃以愛的陳敏之與飾演Nic的唐文龍的一段不倫戀睇到觀眾和網民鬧爆，唐文龍背妻偷食當然錯晒，不過身為第三者的陳敏之都真係好過份。由她主動勾引唐文龍演活了一隻狐狸精開始，她的角色就愈來愈惹人討厭，無論她表現到幾咁愛唐文龍，幾咁願意為愛付出，為愛不顧一切，她所做的種種行為結果都係得一個，就是破壞人家庭。所以她這條感情線完全得不到觀眾的支持，她怎樣苦戀人夫唐文龍都得不到大家的同情，只會覺得她自己攞嚟的。

今晚播出的第二十一集入面，陳敏之明顯是想得寸進尺，結果令到唐文龍好反感，甚至提出分手。陳敏之似乎忘記了做人第三者是不對的，還理直氣壯問唐文龍：「我哋應該可以好開心，點解會變成咁？」虧她可以講得出口，盡顯她做第三者的自私。最後兩個講到要分手，陳敏之仲好似好瀟洒，原以為這段關係可以告一段落，點知原來陳敏之根本放不低。

為了挽回同唐文龍的一段情，陳敏之竟然做埋跟蹤狂，睇唐文龍的schedule再跟實對方，好恐怖！最後她仲出大絕咁話：「我哋講好咗唔影響到你，點解我要咁貪心？我知我過咗界，但係我控制唔到自己。我應承你我以後都唔會咁樣，我應承你今日之後唔搵你，我等你搵我。」唐文龍就話：「我哋唔可以一世都係咁樣。」她即說：「我唔要一世呀，我要依家，我哋過得一日就一日，我已經好滿足㗎喇，我唔想有將來，我同你唔想有將來！」承諾會變乖變聽話，仲講到自己只追求眼前的快樂，不用對方給予將來，自然不會讓對方感到壓力啦，男人會覺得可以玩完就算，直情係無負擔呀。陳敏之出到呢招自然可以令唐人龍回心轉意啦。