娛樂圈有唔少愛狗之人，好似Jolin蔡依林嘅比熊犬WhooHoo，萬千寵愛在一身，除咗去到邊都帶住愛犬之外，有傳Jolin年花百萬新台幣照顧佢嘅起居飲食。呢日係WhooHoo11歲生日，Jolin上載幾張靚相，原來佢準備咗一個有WhooHoo公仔嘅寵物蛋糕。不過大家都知Jolin一向對身形非常注重，嚴格控制飲食，估唔到連佢隻狗都一樣，Jolin留言話：「雖然是寵物蛋糕，還是只能吃兩口。」

Jolin不時帶住愛犬WhooHoo周圍去，無論拍MV、去金曲獎表演都狗不離身，白雪雪圓碌碌嘅WhooHoo深得大家喜愛，Jolin仲將愛犬嘅酬勞捐出作慈善用途。1月7號係WhooHoo 11歲生日，Jolin上載3張相並留言話：「最愛的熊董11歲了！送上法式寵物蛋糕。」Hashtag佻皮地提醒WhooHoo「還是只能吃兩口」。除咗怕WhooHoo食得太飽會變肥，亦同時因為狗仔11歲已經算係高齡，為咗身體健康真係小吃多滋味好啲啦！