上星期的《溏心風暴3》中，火姐（李司棋飾演）就因為黃以愛（陳敏之飾演）搶人老公（NicNic），破壞別人家庭幸福而大大力掌摑黃以愛（陳敏之飾演）。看到此幕的家庭觀眾都稱大快人心，而有一部份的人就為黃以愛心痛。對於為人母親的觀眾尤其是百感交雜。其實對於司棋姐來說，這一幕更是深刻，因為同樣地司棋姐也有一名女兒，而司棋姐也經歷了兩段失敗婚姻。

火姐（李司棋飾演）接受《香港01》訪問時，談及現實中會否有這種母親掌摑女兒的情況。司棋姐說：「我見翻佢（女兒）嘅時候，佢已經係讀完大學。佢由細到大都係好叻，好懂事嘅人，唔會激動到我去到個位。更何況我覺得你無論講咩都阻止唔到佢，佢哋一鍾意左就唔會輪到邊個出聲，愛情唔係咁理智嘅事情。有時候你可以做嘅，唯有係Let (it) go，祝佢好運。」「唔係個個嘅愛情故事都係咁。如果你諗得咁簡單就係一個傻人。」

總括而言，李司棋的母親在對她的態度，或多或少都有影響。「愛情嗰方面，因為我媽咪始終比較管我係呢方面嘅發展。雖然到最後我嫁個老公佢都係唔鍾意，所以我都有呢方面經驗。我唔會太過俾我個女壓力。但係佢識咗個男仔帶返屋企之後，我就一定會好好地同佢傾下，或者講俾佢聽我嘅感覺。但係之後我就唔會再理佢。」

其實司棋姐對於女兒的戀愛，一直是開明的。這個很明顯很可能就是繼承自她的母親。「我識咗個醫生（前夫）嘅時候，佢（李司棋母親）表面上一路都唔表態。最後我哋行得幾好嘅時候，佢就同我講「你覺得佢適合咩？』我話：『佢有咩唔好呢？』佢又講唔出啲咩嘢。係到我結婚嘅時候，佢就好唔鍾意，可能係feel到有啲嘢，但係又講唔出。所以媽媽肯定係當個女係寶貝。只係我哋沉迷係愛情入面嘅人feel唔到。」

訪問的最後，李司棋更談到自己的一段婚姻。「同埋去破壞人哋家庭，邊一個人會瞓得安樂？講真，我同醫生老公離婚，都係有人破壞我哋家庭。佢地嘅故事，我哋睇到最後，其實係有報應，我信㗎。我成日都話唔好做呢啲事。如果我單身，有家庭嘅人嚟追我，我一定唔會理佢。」