【溏心風暴3】米雪早有預謀呃親家錢　韓馬利嬲到要佢全家墊屍底

無綫50周年台慶重頭劇《溏心風暴3》已經進入了結局周，劇情的進展亦明顯推快了，好似講Belle （岑麗香飾） 同Brian （陳智燊飾）由結婚到幸福生活到Brian畀車撞死那兩集，原來已經過了兩年時間。今晚播出的一集就講香香被奶奶，即Brian阿媽（韓馬利飾）鬧是不祥人，Brian媽深信香香克死了Brian，害到她楊家絕子絕孫，傷心之餘亦都嬲到震，決定要同香香斷絕關係，將她逐出家門，仲話想香香一家墊Brian屍底，兼要他們還返50億。而Brian媽本身都是個迷信的人，在Brian出世時亦找了很多師傅為Brian算命，那為甚麼她娶香香做新抱之前，又怎可能沒有查清楚香香的時辰八字呢？

原來一切都是Belle媽咪（米雪飾）在搞鬼！Brian媽當然有問米雪拿香香的時辰八字，來給師傅夾過算過先至娶香香過門啦，不過又點會估到米雪竟然會畀錯時辰八字吖。香香明明在英國出世，照道理出生日期時間就梗係計英國當地時間啦，但米雪卻給了香港的日期時間當作是香香的時辰八字。當Brian媽質問米雪為何英國出生會畀香港時間，米雪居然仲理直氣壯咁話：「我哋係香港人！」係香港人就留在香港生啦，做咩當初又要走去英國生呢？她分明就是處心積慮想呃Brian媽50億來救老公間公司，特登講錯香香個時辰八字，只係無諗過會畀Brian媽發現同埋算帳啫。