香港出生率愈來愈低，身邊好多朋友結左婚都選擇唔生BB，最多都係一個夠晒數。不過凡事總有例外，2008年香港小姐亞軍陳倩揚，10年結婚先後生咗兩個囝囝，不過佢就未有封肚，呢日宣佈嚟緊會變做一家五口啦﹗倩揚接受香港01訪問時話：「依家有咗三個幾月剛剛講得，預產期7月，兩個仔成日痴住我個肚，話要同BB傾計呀哈哈。｣

早前倩揚一家人就去到北海道旅行，順道慶祝兩夫婦相識15周年。懷孕初期又遇上大風雪，真係聽到都覺得牙煙呀：「剛剛去完旅行返嚟，當地落好大雪呀，不過已經去到第三胎自己都有晒經驗，今次都無滑雪啦萬事小心至上，大件行李粗重嘢唔使我做，主要係睇住兩個仔，陪佢地玩吓雪已經好開心。｣而兩個囝囝知道就嚟做哥哥都相當興奮：「兩個仔成日痴住我個肚，話要同BB傾計，細細都知知地做哥哥呢件事，仲話自己聽到BB講咩，哈哈哈。佢地都好聽話，有時會幫手執下自己嘅玩具，自己都相當安慰。｣

自從離開TVB後，倩揚嘅工作機會不減反增，宣佈喜訊呢日佢亦有出席活動擔任MC，仲非常敬業著上3吋高踭鞋：「唔係好長時間，d客好細心叫我著平底鞋都得，自己都會繼續工作，通常做主持多時間唔會話好長應付得嚟。｣除咗幕前工作，倩揚亦將自己嘅家庭主婦心得發揚光大，於網上同大家分享：「好似直播煮下嘢食原來好多人睇，出街好多市民同我講有睇跟住煮，互動比起做幕前工作更多，另外最近仲試下做設計推出啲便服，自己畫畫唔係好叻，有靈感就畫低再交俾日本嗰邊去審批同生產，好多網友話啱心水，覺得好大成功感。｣嚟緊倩揚仲滿腹大計，想出埋餵奶巾口水肩仲有親子裝，實行幕前幕後雙向發展，努力賺奶粉錢。