【切勿摹倣】食燈泡糖要搵命搏　容羨媛唔敢夾硬塞入口怕出事

可能大家睇電視都曾經睇過有些亡命表演吞劍又或者食燈泡，而今時今日雖然仲未發明到普通人可以點樣吞劍，不過就真是可以食燈泡喇。近期大陸就流行一種叫「燈泡糖」的棒棒糖，經網紅熱賣，呢支糖的size真是十足一個燈泡咁大。本來就咁食糖無咩問題，但網上竟然盛行起一種超危險的食法，就是將整個燈泡糖塞入口中，燈泡仲大過個口，塞入去已經好困難，整到牙骹軟晒，而最危險之處就是夾硬塞了入口之後，更加難以拿返出來，卡在口中的時間耐了有機會引致窒息，分分鐘連命都無。

而昨晚播出的《東張西望》就提醒大家千萬不要試呢種搵命搏的食法，主持人容羨媛（Fion）更親身一試到底咁大粒燈泡糖點樣可以塞到入口裏。以前節目另一主持吳幸美都試過飲「斷片酒」同「瞓覺水」，真係咩都夠膽試，她曾表示自己：「豁出去。」不過今次Fion就明顯無豁出去喇。當她嘗試將燈泡糖放入口中時，雖然已經摯到個口好大，但燈泡糖根本大過個口，當然無辦法輕易就可以放入口中啦。而Fion亦沒有仿效那些內地網紅咁，夾硬撐大個口出盡力塞粒燈泡糖入去，她將粒糖放在口前度完位後立即就放棄了。老實講，硬塞燈泡糖入口真係危險過在安全環境下飲「斷片酒」同「瞓覺水」，所以Fion無吳幸美咁勇於嘗試是可以理解的。