【反黑】姜文杰招積出figure　「細華」姜文杰爆：會出場手機遊戲

《反黑》一劇2017年在Youtube上播放後，取得空前成功，隨後更受到非常多網民追捧。近日《反黑》第一季更被Netflix購買，成為首部在Netflix上架的華語劇集。不少人在看畢首季後仍然意猶未盡。雖然《反黑2》就有排都未有得睇，不過《反黑》劇組就似乎冇諗過俾個熱潮停。皆因演員之一的「細華」（姜文杰）透露，《反黑》將會在幾個月推出周邊商品，更會有令男仕們瘋狂的手辦figure。

姜文杰接受《香港01》訪問時說：「等緊我哋第二第三季去拍，其實仲有一段好長嘅時間。咁點算呢？其實佢哋都肚餓㗎嘛。所以除咗有啤牌可以平時玩之外，嚟緊仲會有figure同埋遊戲。第一手嘅figure嘅頭雕同埋衫、槍，其實已經做好咗，包括有主角陳鳳翔同埋張少鈞。不過最令人刺激嘅消息係咩呢，就係唔單止由佢兩個，就係神爺、招積等等都會做。呢個消息係新鮮滾熱辣，如果係真嘅話其實我都好開心。因為我哋唔使淨係買外國figure，你終於可以有返啲本土嘅英雄人物。」

至於遊戲部份，「細華」姜文杰就表示劇組正在聯絡《小朋友齊打架》的作者，想話嚟個《小朋友齊打架》crossover《反黑》手機遊戲咁話。不過遠在外國的作者就尚未回覆，但是姜文杰則透過鏡頭呼籲，希望作者知道就盡快聯絡佢哋。「細華」姜文杰更說製作《反黑》啤牌、貼紙及figure遊戲，其實是在完成自己小時候的夢想，希望大家會支持。