貪靚係女人嘅天性，不過愈來愈多男仔都好注重自己嘅儀容，就好似丁子朗咁，佢話唔少朋友都話佢最出名就係姿整，「男仔貪靚方面，我認第二都冇人敢認第一！」佢仲話：「我化妝袋仲大過啲女仔！」究竟有幾大個？佢就即席拎出嚟畀大家睇，又真係好大個！大約大過A3 Size少少！入面仲有好多化妝品！

一打開個化妝袋，就見到好多支裝嘅物體，包括定妝噴霧、保濕噴霧，丁子朗就話：「一日做嘢可能會做足成日，個妝要keep到好重要。」不過更令人意外就係，淨係遮瑕，丁子朗都有3、4款傍身，有防水遮瑕、可以溝色用嘅遮瑕，仲有遮瑕膏！遮到瑕疵對於丁子朗嚟講真係好重要！

而家個化妝袋已經夠大個，丁子朗就話：「好想再換過大個啲，連啲女仔見到我嘅化妝袋都覺得好誇張。」有咁大個化妝袋，丁子朗當然都識化妝：「我今日個妝都係自己化，然後有同事見到我條眉，就話我條眉有啲亂，我就即刻修下，都唔錯呀可？有時候女仔要畫眉，都會問我借」真心佩服丁子朗咁貪靚！而佢都有自己一套護膚方法：「女仔敷啲咩mask，我就敷咩mask。而我推介大家食維他命B，食完就會少啲暗瘡，皮膚就會有光澤。」