作為女仔，都會好貪靚，單文柔都唔例外。話說佢就分享護膚心得，表示化妝緊要，但落妝更緊要：「如果化得唔乾淨個妝，皮膚差咗嘅話，無論你用幾靚嘅化妝品，都係會唔好。」咁單文柔落妝會唔會好似Janice Man咁，又用cleansing oil，又有洗面奶呢？佢就話：「眼妝同成個妝會分開洗，一共會洗3次，所以成個過程要10分鐘左右。」

而單文柔就對化妝比較有信心，亦好了解自己嘅臉型化適合嘅妝，因為上鏡肥十磅：「我自己都係面對緊呢個問題，所以出街同上鏡都會化唔同嘅妝。平時出街剩係腮骨位置落shading，因為日光照住之下，如果顴骨都落，望落去好似做緊舞台劇咁。而上鏡嘅時候，會喺腮骨、顴骨嘅位置會落一落膏狀嘅shading，先再落粉狀嘅shading，咁就多一層。」

問到情人節有咩活動，單文柔就話係公司返工，亦冇提早慶祝：「冇約到（陳展鵬）喎！我剩係畀公司約咗（會唔會去陳展鵬屋企拜年？）我會去唔同長輩屋企拜年，而展鵬佢就新年好似要去登台，睇下大家就唔就到，始終工作比較重要，要工作為先，希望都可以就到時間。」早前兩人一齊做義工，單文柔就話係一個好好嘅體驗，感覺都好舒服。