夏雨仔黃奕晨想搬走 均真業主阿爸要計足租金：收我兩萬租
撰文：張嘉敏
出版：更新：
香港樓市愈升愈有，唔止樓價keep住破頂，連租金都一樣步步高升，夏雨的仔仔黃奕晨 (Dixon) 最近就以budget一萬二千元想在西貢租村屋住，竟然都租不到，Dixon表示：「萬二蚊只係租到一層劏開一半300幾尺嗰啲單位，我想租晒一層700幾尺，因為自己好多嘢同埋養狗仔想要大啲地方，但要成萬七蚊先租到，好過份。依家啲租金貴到離譜，喺香港生活真係唔容易。」
黃奕晨最近搵緊屋搬,,唔通係想同女朋友Cherona同居?（梁碧玲攝）
現在仍跟爸爸夏雨同住的Dixon，點解又唔慳返啲錢而想要搬出去住呢？Dixon說：「我想獨立，想自己一個人住，爹地都係想我可以獨立。」他亦好乖仔，無話攤大手問爸爸拎錢幫他，夏雨都不會寵壞仔仔讓仔仔想要咩就畀咩他，Dixon笑言：「我有叫爹地不如租佢另一個單位畀我，佢話如果我畀得到每月兩萬幾蚊租佢，就租畀我，嘩，好貴囉，我喺出面租算。」夏雨果然好均真。
Dixon笑指老豆父親要收佢好貴租。（梁碧玲攝）
提到近日有網民討論在香港做人愈老實就愈蝕底，對此Dixon說：「睇下點界定老實，我覺得要過到自己良心，唔好咩都咁計較。自己好少話會怕蝕底，尤其做呢行就要唔怕蝕底，同埋好多時自己蝕咗都唔覺，有咩所謂吖。我爹地由細到大都教我做人最緊要唔好怕蝕底，做人要開心。」
Dixon都話喺香港生活唔容易。（梁碧玲攝）