2016年10月熊黛林正式榮陞郭太，下嫁郭可盈細佬郭可頌，話咁快就造人成功，嚟緊5月份就到預產期啦。日前Lynn挺住8個月巨肚，孖住老公一齊影大肚相。唔知名模係咪得天獨厚，Lynn肥肚唔肥人四肢依舊纖瘦，仲Keep住咁專業，為咗影靚相踮起腳尖拉長比例，真係睇見到覺得牙煙呀。

呢次大肚照拍攝Lynn先後換上3套衫，吊帶連身長裙盡顯美好身段，長袖貼身棗紅色長裙嘅S曲線更加女人味十足。仲有一套就係同老公郭可頌嘅白色情侶裝，就好似家居服一樣，表露佢地最自然一面，相中見Lynn笑得開心燦爛，佢表示：「希望第時同BB提起，都有相讓BB知道爸爸媽媽是如何幸福地迎接BB到來。」

【最勤力孕婦】胡杏兒即將卸貨 大肚靚相圖輯任睇

至於爸爸郭可頌亦愈來愈fit，手臂肌肉盡現，看來做型爸單手抱B都無問題。「一直老公都好照顧我，有了BB後老公更事事以我為先，我覺得好開心，睇得出自己真是無嫁錯人。」

作為準媽咪，Lynn現在未覺緊張，反而非常期待BB到來，但同時又有點捨不得與BB身心相連的親密關係，「每次BB在我肚入面郁我都好興奮。」問到Lynn有否特意看書學習湊B及教小朋友技巧，Lynn表示自己只看了少量關於育兒書籍，平日反而多向有經驗的朋友請教，「我們都想順其自然，第時再一步步學習，我不想給家人及BB太大壓力。」果然是貼心溫柔的媽媽及老婆。