宇宙最強甄子丹（丹爺）武功高身手好就出晒名，原來他跳舞都好勁，SEE SEE TVB facebook官方網頁日前就公開了一條陳年舊片，片中的丹爺非常之年輕，目測應該廿多歲左右，身形亦都好瘦削，跟他現在的健碩爆肌身形有好大差別。片中主持何守信問丹爺有無練開最近流行的舞蹈，丹爺話：「有，勁舞囉，英文即係break dance。」

跟住鏡頭一轉，已經見到丹爺同另外一位黑人dancer一齊跳舞，當然是跳他話有練開的break dance啦，跳到十足街舞咁，好勁㗎。就連Michael Jackson經典的moon walk都難不到丹爺，他還跳到在地上做一字馬兼且跳躍凌空一字馬，有功夫底跳舞果然唔同啲，個頭貼在地上踢腳旋轉這些動作他都輕鬆完成。網民都紛紛留言讚他跳得勁，又話條片好搞笑，亦有人話他跳得仲好過陳偉霆呀，唔知丹爺遲些會唔會返內地拍街舞節目呢？