活蟹識得揸刀仔抵抗被劏 美女廚神譚嘉儀：剪繩前要斬咗對蟹鉗先
撰文：張嘉敏
出版：更新：
近日有外國網民於facebook上載了一段短片，講述一個男人想劏蟹時遇到蟹的奮力抵抗，而最搞笑是該隻解竟然識得用兩隻蟹鉗拿住把刀仔，就好似拿住武器反抗咁，仲識得用把刀仔來擋住男人用來對付牠的菜刀。不過經過一輪擾攘之後，隻蟹最終都棄械投降，舉起兩隻蟹鉗個樣真係好似舉高雙手咁，成個人咁樣㗎。網民都紛紛留言話好好笑。
隻蟹真係好搞笑。
港產美女廚神神譚嘉儀 (Vivi) 細細個已經入廚房幫手煮嘢食，早前更於日本東京修畢法國藍帶廚藝課程，無論是日常煮嘢又或是上堂學廚都一定會接觸活生生的食材，當然都處理過蟹啦。問到Vivi有無遇到片中類似的情形，她說：「兩、三年前試過買蟹返屋企煮，啲蟹被繩綁住咗對鉗，咁我諗住要處理隻蟹就梗係要拆繩先，點知剪咗條繩之後，啲蟹就舉起晒對鉗，仲通屋走，我好驚又唔敢捉，就用個筲箕反轉嚟蓋住啲蟹等媽咪返嚟處理。」
Vivi都試過搞唔掂啲蟹。
Vivi對付活蟹的方法就是首先斬了兩隻蟹鉗，當然斬之前不要剪開條繩啦：「無咗對蟹鉗就唔使驚畀啲蟹整傷喇。」Vivi話她在藍帶學廚時，老師教處理活食材最人道的方法，就是即刻結束牠們的生命，如果煮龍蝦她就會首先擰斷個龍蝦頭。
Vivi話老師教處理活食材最人道嘅方法，就是即刻結束佢哋嘅生命。