13萬次收聽得12蚊版稅 C君：YouTube幾百萬點擊都係得百幾蚊
撰文：朱奕錦
出版：更新：
喺香港地做原創真係認真艱難，音樂都係其中之一！曾經同譚詠麟、何韻詩、許廷鏗同C ALLStar等合作嘅填詞人王仲傑，近日就po出一張由CASH（注：香港作曲家及作詞家協會）派出嘅版稅表，佢一首作品在JOOX、KKBOX、MOOV等網上音樂平台，共有13萬人次點擊或者下載收聽，但係就得12.21HKD收入，喺麥記連個包都買唔到，真係慘慘豬呀！
王仲傑喺Facebook寫到：「無言。感激。以對。」盡顯無奈(王仲傑FB)
其實王仲傑以前係銀行高層，但佢堅持以填詞人自居，為支持廣東歌，躋身音樂行業，但係收入就大幅縮水。此相一po出之後，就有好多網民關注：「一千人聽，所得稅唔夠一毫子」、「少得咁可憐」等 ，替作詞人唔抵。
不過王仲傑其後都有喺面書度留言話：「除咗網上音樂平台點擊率，其實一首歌仲有其他收入，例如賣碟、其他播放率，不過可以想像，一樣係好少。」雖則現況好嚴峻，但係王仲傑都表示因為自己好鐘意，想繼續寫廣東歌，所以都會繼續努力做落去！除咗收入問題，佢仲想反應一樣嘢比香港作曲家作詞家協會：「到咗2018年，仲印statement寄比會員而唔可以轉e-statement，我覺得好唔環保。」
就算喺作詞人呢條路上搵食艱難，但王仲傑依然都會繼續努力，堅持行落去(ig圖片)
而農夫嘅C君亦深明做音樂的辛酸，他說：「我有首歌叫《偉大航道》，喺YouTube有過百萬人點擊，但係個版稅都淨係得百幾蚊，CASH呢每年都會send網絡版稅，幾蚊、十幾蚊都有，但係我之前幫方大同寫歌都好高，有幾百蚊，所以都有唔同嘅，（但係點解會咁低？）因為網上始終係免費聽呀嘛。（駛唔駛同陸永平分嗰d版稅呢？）陸永就填詞填得多嘅，我呢就作曲比較多，所以會多小小。」即係作曲好揾啲喎。