如果你參加陳志雲主持嘅《百萬富翁2018》，去到一百萬嘅題目度，見到條問題係問你2011年嘅亞姐冠軍係邊個時，就算畀埋A. 陳思恩、B. 王家敏、C. 洪利朱、D. 馮雪冰，呢四個選擇你揀，我諗你最後都真係無謂咁博拎錢走算數。而其實呢題嘅答案係D. 馮雪冰，而且呢位亞姐冠軍更加係靚到好似天仙咁，如果佢當年係參加港姐加入無綫，應該真係一早就紅咗。

唔識馮雪冰唔緊要，依家介紹返。當年佢參加亞姐時，已經有討論區巴打睇中佢，仲開Post盛讚佢好白好靚好索好正，更加有人話佢贏唔到冠軍就切（當然我唔知佢想切咩），好彩呢位網友唔使因為賽果而犧牲自己。唔知係唔係因為佢選完之後喺演藝上唔係太活躍，無論佢嘅Instagram定係微博都好少Follower，只能夠話網友走寶冇眼福。

不過，馮雪冰嘅生活都真係幾神秘，平時喺網上都係貼啲飲飲食食去旅行周圍玩睇下藝術展嘅相，完全唔知佢其實係打咩工，最多最多都係喺啲活動度見到佢閃一閃過咁，最近就有指佢申請咗去馬爾代夫Working Holiday，喺一個小島度做接待員，同時幫華人旅客做翻譯。雖然係咁，佢都冇忘記過一班由佢參選時已經鍾意佢嘅Fans，間中都會開心Share啲養眼靚相咁，件事都幾歡欣。