【世界巡迴婚禮】大仔娶台女友 陳美齡錫到燶：呢個新抱值120分
撰文：洪曉璇
出版：更新：
做人新抱甚艱難，做個又體貼兼識做嘅好奶奶，其實仲難。陳美齡同丈夫育有三名兒子，含辛茹苦供書教學，終於等到娶新抱嘅一日。大仔金子和平迎娶美籍台灣女友莊文若，呢日喺香港筵開16席婚宴。見到陳美齡對新抱照顧有加，仲親自彎腰幫佢整理裙擺，佢接受訪問時話：「我俾足120分！」
陳美齡一家人於中環街頭大合照，相當有香港特色。(梁碧玲攝)
由於親友遍佈各地，連結婚擺酒都要世界巡迴，陳美齡指：「前後有4場，台灣日本都已經完成，今日係第3場，7月仲要喺美國擺酒。」聽見都覺得攰，但見到囝囝娶得賢妻，陳美齡再辛苦都笑到見牙唔見眼。問到新郎哥，媽咪送咗咩禮物俾佢地，金子和平用英文回答話：「太太頸上嘅呢條頸鍊係媽媽送，其實係傳家之寶，以前嫲嫲送俾媽媽，依家再送俾我太太。」代代相傳真係相當有意義呀。
金子和平同太太莊文若應傳媒要求合照，陳美齡馬上彎腰為新抱整理裙擺，相當細心。(梁碧玲攝)
問到陳美齡點評價新抱仔，佢即時滔滔不絕分享：「佢真係好好，又賢淑又乖女，下廚又相當了得，對我好體貼。最緊要係我囝囝鐘意，我比夠120分佢！」錫到出晒面阿仔會唔會呷醋架?陳美齡哈哈大笑話：「緊係唔會啦，佢知我係愛屋及烏。」至於會唔會催佢地生BB，陳美齡就話自己好恨抱孫，但尊重後生有自己計劃：「我已經送定自己本書俾佢地，分享育兒心得。」
+9
陳美齡透露本身訂造一條藍色裙，但朋友提點可能新娘會選擇呢隻色，所以馬上再造一條粉紫晚裝。(梁碧玲攝)