組合Super Girls的Heidi（李靜儀）一直都係年輕人嘅潮流Icon，大家都好鍾意睇佢IG學嘢吓嘢跟住著衫，之前佢去台灣做嘢仲被當地網紅「黑男」捉咗去玩街頭配對，形容佢做「香港頂級美女」，網友個個大讚佢仙氣爆燈！不過黑男真係有眼不識Heidi，話晒Heidi都係我哋香港IG女神，唔打得都睇得。

其實Heidi自己本身都讀Fashion嘅，所以就同街頭品牌Popcorn合作設計咗一系列嘅衫，叫做「Be True to Yourself」，字面意思就係話要忠於自己，但Heidi係藝人，難啲喎，佢解釋：「都係㗎，特別係我做呢行，大家見到我可能係好靜，但我本身個人係好直接，諗到咩就講咩，但經理人會同我講唔好亂講嘢，做人要圓滑啲，唔係就會好易得罪人。」

啱嘅，Heidi唔出聲個樣真係好仙氣，除此之外，Heidi一雙長腳同骨感嘅身材都係一大賣點，不過有網民就覺得佢「萬事俱備，只欠胸部」，Heidi聞言爆笑：「係啊，我都有聽過，咁我又唔介意，始終都係媽咪畀我嘅禮物，最重要係健康啫，我其實都唔係好瘦咋，你睇我條腰都有肥肉㗎。」記者見Heidi好辛苦咁喺腰間捏出少少贅肉，大家就放過Heidi啦。