唐文龍「封胸」唔騷肌要辭演電影？「《溏3》我先破例做」

唐文龍昨晚出席澳門電影《愛比死更冷》的首咉禮。上台講話時，唐文龍也顯得有氣無力，仲俾司儀話係：「未見過講嘢咁斯文嘅唐文龍。」不過實情是唐文龍抱病在身，食住藥都要去自己有份參演的電影首映禮。

唐文龍接受《香港01》訪問時說：「本來要拍嘅嘢全部搬晒去下半年，所以呢排就有返時間練功夫練兵器。但係練得太勁，唔小心就『攝』親。」《溏心風暴3》之後，唐文龍憑著「阿Nic」一角再度彈起成為男神的行列，工作亦隨之而來。他説：「有接洽囉，但係好無奈個角色唔係太適合，所以就好痛心咁請辭咗。香港電影嚟嘅，不過冇乜發揮，個心有啲無奈。」

唐文龍原來已經紅到揀嘢做？唐文龍說：「其實唔係揀嘅，的確個角色唔係太多發揮機會。」問到他比較不偏向演哪些角色時，唐文龍說：「我會比較介意太過多『露肉』嘅角色。（一嚟就除晒上身show肌嗰啲？）係吖，冇乜原因就唔會咁做。（有原因就ok？）係吖，《溏心風暴3》對我嚟講已經係好犀利嘅尺度。佢哋咁多年冇叫我返去，而寫個劇中又咁有誠意，所以我就破例去做呢樣嘢。」咁咪好難先可以再見返唐文龍啲肌肉囉？