單立文拍劇仲要準備開演唱會　唔怕冷落豹嫂：理得佢呀！

單立文、黃貫中、夏韶聲、鄧建明、恭碩良等出席《搖滾大俠奏》演唱會記者會，豹哥單立文話：「今次能夠聚埋係一件好難得嘅事，因為大家都好忙，夾期夾咗好耐。」

豹哥道又要忙拍電視劇又要忙音樂，兩者已經好難兼顧，不過豹哥話會兩者取得平衡，但唔知道佢愛拍劇定愛音樂多啲呢？豹哥話：「自己好鍾意嘗試，最重要做一樣你覺得會舒服嘅事情，而拍戲同音樂自己都好享受去做，所以盡量分配一半一半。」

豹哥工作密密麻麻，即係好少時間陪老婆胡蓓蔚？豹哥竟然大膽咁講：「話知佢呀！」但其實豹哥講就兇狠，平時都會作歌同唱歌俾太太聽，可以冧一下老婆嘛，豹哥話：「冧佢已經做咗二十幾年，又作歌比佢唱，又做佢伴唱，但結咗婚之後全部都stop哂，因為冇咗個種激情，已經變左感情，結咗婚之後大家都好珍惜大家之間嘅感情。」豹哥仲講到冇愛就好難去維繫大家嘅感情，一定要有愛嘅元素。