【逆緣．專訪】黎諾懿馬壯味濃難洗走？ 「我同佢一樣貪玩賴皮」
撰文：陳栢宇
出版：更新：
雖然黎諾懿喺《逆緣》做鑽石王老五入型入格，之前又喺《不懂撒嬌的女人》度賤到出汁，但係唔少觀眾都總係覺得佢搣唔甩浸馬壯味，可能佢喺《愛‧回家》嘅演出太深入民心。到底黎諾懿係唔係等於馬壯？諾懿接受《香港01》訪問時就咁講：「我係似馬壯一樣咁貪玩、賴皮，但我唔似佢咁Social，我好怕多人嘅地方，亦唔知點同唔識嘅人相處，好易Dead Air又好怕Dead Air，而馬壯永遠就搵到話題。」
【逆緣．專訪】黎諾懿沉十年再上位 知自己位置：最緊要去到終點
黎諾懿認為自己同馬壯一樣咁貪玩，但係就冇佢咁識Social。（陳順禎攝）
雖然諾懿覺得自己同馬壯有分別，但佢就話其實都有唔少監製叫佢離開馬壯嘅影子：「佢哋問我可唔可以搣甩馬壯啲嘢，但其實我冇做馬壯好耐。大家咁諗，可能係因為我馬壯前冇咩代表作，而《愛‧回家》有成900幾集，所以先會咁。向好方面諗就係大家都好記得我，甚至依家出街食飯，都有人叫我馬生，叫我老婆馬太。」
黎諾懿話好多監製都叫佢搣走浸馬壯味。（陳順禎攝）
其實諾懿都覺得要搣走馬壯味都幾難搞，因為佢其實都唔係好清楚咩係馬壯味：「我喺度諗，到底呢樣嘢係唔係已經入咗骨，所以我拍拍下《馬家開飯》都停咗。不過，如果要搵樣嘢整死馬壯，我又覺得好可惜。唔整死佢，我又開唔到新嘅一頁。」咁諾懿覺唔覺得自己「後馬壯時代」好馬壯？佢笑住咁話：「我死都話唔似架喇，哈哈！好似《不懂撒嬌的女人》嘅賤Han咁，台前幕後都好幫我塑造呢個角色，林文龍間中都提醒我唔好太馬壯。如果冇唐詩詠嘅楚楚可憐，我亦絕對冇做得咁賤。」
黎諾懿睇返自己嘅演出就話自己依家一啲馬壯味都冇。（陳順禎攝）
+10