【專訪】布志綸去布拉格拍MV 奪吳海昕第一次：我有少少唔好意思
撰文：陳栢宇
出版：更新：
開始展開個人音樂旅程嘅Mr.主音布志綸（Alan）最近推出自己包辦作曲填詞嘅Solo新歌《經得起變化》，除咗搵嚟同公司嘅吳海昕（Sofiee）做MV女主角，仲去咗布拉格拍攝成個MV添，真係可以話有齊靚人靚景。不過，去呢啲咁浪漫嘅地方唔係應該帶老婆去開心啲咩？記者之後就笑Alan同Sofiee去好似好嘥咁，Sofiee就即刻話：「其實係我浪費咗，我係第一次去布拉格，但竟然係同呢個人去。」而Alan就話自己令到Sofiee冇咗「第一次」有少少唔好意思，而佢自己以前就已經同老婆去過布拉格。
就係咁，吳海昕就畀咗「第一次」俾布志綸喇。
+2
布志綸講笑話唔敢再搵吳海昕拍MV。（黃國立攝）
+6
Alan同Sofiee都話其實佢哋兩個本身都唔熟，但經過今次出埠工作就互相了解咗更多，其中Sofiee仲笑住話依家同Alan係稱兄道弟：「我為隊Crew帶嚟好多歡樂，我哋兩個喺MV裡面就做情侶嘅，有時我前一秒就好Sweet，一Cut機就變咗驅魔人個樣。」談到Sofiee之前都有機會唱劇集主題曲，Alan就話「聽得出佢係鍾意唱歌，把聲都幾入咪，佢有做歌手嘅入場券，咬字方面就慢慢練習啦，總體嚟講係有音樂Sense嘅。」又笑住話自己唔敢再搵Sofiee做MV女主角：「我都驚觀眾會悶，都驚成日用你，搞到你班Fans唔鍾意我。」想睇下佢哋兩個有咩火花就要睇下面片喇：