林雪出名好戲相信無人會反對，在電影中基本上扮乜似乜，宜家連拍個廣告扮可愛都做埋！講緊嘅係佢同杜小喬一齊為酒水品牌Somersby拍的一輯廣告，兩個人不停喺度唱「Apple, apple, Somersby apple」，真係好鬼洗腦！呢個廣告據知未有在TVB播，所以未必好多人睇過，但如果平時有睇開YouTube又或者有去Neway唱K，播廣告嘅時候都一定被迫睇一陣。

今次廣告兩人大走可愛路線，要林雪扮可愛當然係有啲格格不入，不過雖然係咁，睇落都係覺得好笑，唔會太尷尬。相反杜小喬扮可愛就真係有啲難頂，可能佢本身都唔係行呢類路線啦？同埋兩個唔知點解笑起上嚟嗰陣係有啲尷尬，可能始終少合作，加上個廣告跳嗰隻舞真係有啲奇怪，唔知點解會諗到跳啲咁嘅嘢？