【飛虎之潛行極戰】梁烈唯差佬變恐怖分子 扮奸笑聲勁似小丑
撰文：關穎賢
出版：更新：
《飛虎之潛行極戰》周一（5月14日）首播，已經有打鬥、爆破場面同槍戰，去到而家科技發達嘅年代，就已經係通過電話遙控引爆，炸毀灣仔金紫荊廣場！
但講起炸彈，相信大家都好懷念《飛虎II》大結局入面，袁偉豪好似撳熄鬧鐘咁，簡單撳個stop掣，就將計時炸彈撳停咗！仲有，就係做飛虎神搶手嘅梁烈唯點樣用支點三八，再靠望遠鏡望唔知點解會出現嘅番梘泡上面嘅倒影，從而得知反射位置，去擊中敵人嘅sniper，呢段咁好笑嘅片段，真係睇幾多次都會笑！
不過今次喺《飛虎之潛行極戰》入面，唯唯已經唔再係做飛虎，而係做行為瘋癲變態嘅前海豹特擊隊成員變節成為恐怖份子Kenny，仲以超高IQ同警方鬥智鬥力，佢嗰把魔性笑聲，都幾洗腦！其實今次唯唯被改造成為大反派，演技上都落咗唔少苦功，仲比起幾位主角包括吳卓羲、苗僑偉、黃宗澤等都較為搶鏡，都幾值得大家留意。不過呢，有眼利嘅網民就見到唯唯喺劇入面身上面有兩個紋身，一個係手臂上嘅迷你狐狸紋身，另一個就係手指上「YoLo」嘅紋身。但係問題就嚟喇，既然唯唯係前海豹特擊隊嘅成員，應該身上面會有man啲嘅紋身，但係呢隻狐狸就好似小朋友貼紙咁，一啲都唔型，可以話直頭格格不入，由海豹一秒變成MK仔。