今年天氣相當反常，5月份已經熱到好似炎夏一樣，天文台更連續超過10日發出酷熱天氣警告，海灘泳池當然逼滿人，出街都轉晒背心短褲短裙散熱。龔嘉欣一向以長腿見稱，無論7度定37度都毫不吝嗇大騷美腿，點知喺呢幾日咁熱嘅天氣下，Katy居然話要「封腿」，到底咩事呀？

所謂「夏天為大地帶來美腿」，特別係呢排日日三十幾度熱到飛起，呢個時候唔著得清涼啲分分鐘會熱到暈。龔嘉欣一向喜歡Show腿，官網報稱163CM高但身型比例相當好，無論出席活動定放假去旅行，長腿都會出嚟同大家say hi。呢日Katy於IG宣布：「暫時告別短裙短褲」，附上一張雙腿佈滿傷痕嘅相片，深紅色一撻撻，又似蚊癩又似瘀傷，粉絲睇到都覺得好心痛呀﹗

入行已經9年嘅龔嘉欣，一向受唔少網友追捧，如果上搜尋網輸入「龔嘉欣」，後面係會出一個「腳」字，Katy亦深知自己嘅長處，曾經喺訪問中，問到佢最滿意自己身材哪個位置？Katy笑言：「對腳，覺得幾修長。我沒有豐滿身材也不覺輸蝕，因為身材好壞跟豐滿身形無關，最重要整體感覺均勻。」希望Katy對腳快啲好返啦。