黃榕地獄式特訓參加健美比賽　體脂剩6%變鋼條：覺得自己已經好叻

日日運動除咗身體好，有時仲可以令一個人改頭換面，形象即時健康晒。曾經推出多本寫真集嘅性感女星黃榕，身材本身已經唔錯，呢日現身一個大型健美比賽，唔係做嘉賓而係參賽者﹗睇佢一身健碩肌肉，配合比賽搽黑皮膚，線條更加明顯，第一次參賽就勇奪第4名相當厲害呀﹗Gloria接受《香港01》訪問時話：「比起其他參賽者我真係偏細粒，得一個月特訓，真係估唔到有獎﹗」

由性感女星變成健美小姐，好多人第一眼見到搽黑咗兼成身肌肉嘅黃榕，真係完全認唔到。Gloria話正常參加比賽起碼訓練三至六個月，而自己就只得一個月：「之前要做舞台劇忙到4月尾，真正為比賽只係得一個月時間準備咋，第一次諗住參加下架咋，係咁補堂學擺POSE，唔係平時影寫真嗰d，比賽有啲指定動作谷肌肉嗰啲Posing，係咁補堂上速成班。真係無諗過拎獎，居然可以拎到第4名，仲要同第3名同分，真係覺得自己已經好叻啦。」

有做開Gym嘅人就會知，要肥變廋，只要有恆心通常成功，不過要由廋變到有肌肉有線條，已經唔係單做運動就可以成功。Gloria去到比賽前一兩日，腰圍減到20.5吋，40公斤即係不足90磅，體脂少於6%，真係相當誇張，佢憶述呢一個月嘅地獄式特訓，都坦言好辛苦呀﹗

「平時我都有做開gym有腹肌，不過呢個月就要夾埋餐單谷線條，比賽前7日係最地獄，頭三日要瘋狂加鹽食到好鹹，飲大量水份，比賽前五日要完全無鹽，飲水都要飲蒸餾水，因為要避埋礦泉水嘅礦物質。日日食十隻蛋白，白烚雞肉，其他乜都唔食得，個口好似無晒味覺咁，仲要少食多餐，每日起身就做Gym，食蛋白雞肉，再做運動然後再食。」

「每日最少做gym、Yoga、Posing起碼五六個鐘。最辛苦係last星期個人脫水，好似人乾咁，成個人手軟腳軟行步路都無力，天氣咁熱我都起晒雞皮好凍，因為無晒脂肪。比賽呢晚我對腳一直抽筋，可能太耐無食過澱粉質啦，比賽一完即刻同朋友去打邊爐食餐勁嘅。」雖然辛苦，不過Gloria都話諗住繼續keep住呢個身型，考慮緊8月尾參唔參加另一個健美比賽。笑言依家主要工作都係內地登台同埋網絡電影，著起連身裙其實睇唔出咁大隻，唔知情嘅通常只會覺得佢好瘦而唔係大隻。