伍詠薇同老公練海棠相處膽博膽：就算佢呃我都要傾

伍詠薇於《飛虎之潛行極戰》飾演黑社會的頭領，就算同吳岱融做對手戲，都不失霸氣，獲不少網民大讚。人稱伍姑娘的伍詠薇從影多年，她日前接受商台節目《一圈圈》訪問時，提到自己因為太喜歡做戲，所以諗好多嘢，當中包括離婚，她指將來就算同老公練海棠離婚，對方仍然會是自己最好朋友，又笑言「雖然我未必接受佢老婆」。
 

至於點解會提及離婚呢個話題呢？當然就係因為練海棠近年一而再咁傳出緋聞。與練海棠結婚19年，伍詠薇一直認為自己是野馬，從未想過同一個男人相處咁多年。「所以都係膽博膽，好到幾時就幾時，你可以包括對方，但佢又係未可以包容你缺點呢？」練海棠早年一而再出軌，但伍詠薇都撐到出面，莫非呢啲就係包容？伍詠薇話自己在偷食事件上並沒有隻眼開隻眼閉，更曾告訴老公「你一係就呃晒我，你呃唔晒，比人揭穿咪蠢囉。」伍詠薇表示當看到出軌報導後，第一個感覺係起雞皮，之後決與老公坦白。「乜都要傾，可唔可以繼續走落去？發生咩事，就算佢呃我都要講，自己當時都有責任，因為要拍戲所以少陪佢。」

「而最近嗰次出軌嘅報導，我就同佢講：『走唔甩啦！唔係我睇到，係記者發現！』係好心痛、好失望。結婚時承諾生老病死，未必做得到，但我盡做，老公係我揀，係咪一面倒佢錯？不如檢討自己有無錯先，我係傻，但我都好均真、好包容，所以我覺得發生呢種事，當中我都有問題。」對於老公偷食一事，伍詠薇表示「我信呢件事真係，但信唔信呢個人，就要比時間。」她除了自我檢討外，亦有抽時間陪對方，但如果到最後要分手，她並不會介意。