【世界盃】俄羅斯超強太太團 前鋒史莫洛夫老婆係選美冠軍
萬眾期待的世界盃將於香港時間晚上11點舉行揭幕賽A組賽事，由東道主俄羅斯大戰沙特阿拉伯。作為主辦國，俄羅斯出到線，唔少球迷都已經收貨。雖然俄羅斯實力有限，假如今晚贏咗沙特阿拉伯，好可能下星期二對埃及都好大機會輸波。睇唔到俄羅斯國家隊踢波唔緊要，值得留意嘅係俄羅斯國家隊嘅WAGs（Wives and Girlfriends of high-profile sportspersons）。
施哥夫太太 Inna Zhirkova
早前俄羅斯網上雜誌《Spletnik》舉行咗個選舉，邀請網民投票選出俄羅斯國家隊最索球員另一半，而效力過車路士嘅老將施哥夫（Yuri Zhirkov）太太Inna Zhirkova就被選為第一位。Inna五官標緻，身材火辣，喺Instagram經常晒長腿同性感照，就算生咗3個小朋友，身材依然keep得非常好。不過靚唔係大晒嘅，Inna原本喺2012年曾經成為俄羅斯小姐，但最後因為喺訪問環節中，被問到究竟地球係圍繞住太陽旋轉，定係太陽圍繞住地球旋轉，一個咁簡單嘅問題，佢竟然答唔知道，最後就因為咁而被褫奪冠軍。
艾堅菲夫太太 Ekaterina Gerun
第二位就係門將艾堅菲夫（Igor Akinfeev）太太Ekaterina Gerun（Katy），Katy生於烏克蘭，父母係作家同老師，喺大學主修化學工程，更精通多國語言，包括：烏克蘭語、俄語、英文、法文，Katy參選過烏克蘭小姐大賽，更奪得第四名，之後就投身娛樂界任模特兒同演員，名乎其實嘅才色兼備。不過Katy就同老公艾堅菲夫一樣咁低調，亦好少活躍於社交平台。
史莫洛夫太太Victoria Lopyreva
下一位要介紹就係前鋒史莫洛夫（Fedor Smolov）太太Victoria Lopyreva，Victoria於2003年奪得俄羅斯小姐名譽，現時除咗係電視主持同演員，間中都會做模特兒工作，今年亦係世界盃官方大使，負責推廣世界盃。