【2018世界盃】杰寧公主VS董嘉儀　揭幕戰邊隊會贏？

全球觸目嘅世界盃2018今晚正式開鑼，揭幕戰A組賽事就由俄羅斯對戰沙特阿拉伯。雖然好多人都話今屆揭幕戰係近年來最冇睇頭嘅賽事，但係作為睇波唔睇靚仔嘅女球迷，點都要支持吓呢項盛事，睇吓東道主俄羅斯踢成點啦！真球迷潘杰寧（杰寧公主）同「燈神」董嘉儀（Lulu），接受《香港01》訪問時，大談呢場波嘅睇法。

杰寧公主表示俄羅斯同沙特阿拉伯嘅世界排名係32隊裡面排名最低，加上兩隊都冇乜頂級球星壓陣，都應該冇乜睇頭，謂：「有冇話好悅目嘅足球睇呢，我都覺得未必架喇。如果講比數，自己就覺得入球會比較少，俄羅斯稍勝1球，始終帶住主場優勢加主辦國，第一場都應該係贏到波！」

「燈神」Lulu就同樣支持俄羅斯小勝沙特阿拉伯，雖然兩隊嘅年級都偏大，直言：「俄羅斯中場9號仔迪沙高耶夫幾勁，幾好波，但上屆歐國盃冇份踢，希望佢今場有表現。東道主嘅威力都好大，但最近7場不勝。」問到點睇22歲靚仔新星高路雲，Lulu笑言：「靠佢喇！」