連詩雅為國際超模大賽擔任評審，日前出席宣傳活動時透露原來Shiga 15歲時便開始做model：「一開始只當係暑期工，為增廣見聞而入行，冇諗過會入行做歌手，一切都係機緣巧合，我因為做model接觸到依家嘅經理人公司，佢哋知道我鐘意唱歌，於是安排試音，咁樣就做咗歌手。」

若是想做歌手，是否應該由model出發？Shiga直言：「如果你已經明確目標係要做歌手，咁當然一開始就做歌手會好啲，但若果你想試新嘢，接觸下娛樂圈唔同嘅嘢，Model會係唔錯嘅起點。」

Shiga 除咗唱歌，不時亦有參與拍戲工作，她坦言十分享受這兩項工作：「拍戲同唱歌可以比到我唔同嘅感受，拍戲個過程比較長，首先要拆解劇本，再加上後製先感受到個結果好唔好，而唱歌就係同聽眾直接接觸，好快就知道聽眾鍾唔鍾意。」