孫耀威爆Seed罵「所謂藝人」講大話借衫 馬姓男藝人即時認錯
撰文：洪曉璇
出版：更新：
藝人每次出席公開場合，都要打扮到靚一靚，衫又唔可以重覆著，如果唔係會俾人話寒酸，所以佢地由化妝整頭到靚衫飾物，好多時都係贊助得來，借嚟著完戴完，完整歸還出返Credit，好多舖都願意相助。孫耀威呢兩年致力發展禮服生意，借衫俾藝人朋友絕不托手踭，點知呢日Eric居然因為借衫，於網上發炮鬧馬姓藝人，到底咩事呢？
Eric一喺16年投資千萬於尖沙咀開禮服公司。（視覺中國）
開幕當日大批藝人著上其出品親自撐場。（視覺中國）
Eric喺16年11月在尖沙咀開舖，投資千萬開設禮服公司，開幕時大批圈中好友包括李克勤、車婉婉、鄧健泓等都有到場支持，呢兩年以嚟佢亦多次借衫俾藝人出席活動，甚至度身訂造舞台戰衣。不過呢日Eric忽然於網上爆seed：「剛剛發現一位所謂藝人來我店借西裝，說是去"CHANNEL"活動，原來只是去馬來西亞參加朋友婚禮！其實你不用講大話啦。告訴我們真實用途就可以了！這樣不是更顯得你的低手嗎？！我送俾你都得啦馬先生！」
謙謙君子Eric忽然公開鬧人，嚇窒唔少朋友。（孫耀威Facebook）
由於圈中姓馬嘅男藝人唔算多，好友們除咗驚訝溫馴嘅Eric咩事咁嬲，亦紛紛推測誰是「馬先生」，馬國明馬浚偉都於名單之上，Eric一一否應，仲話：「我不在page post已經仁至義盡！不想有新聞！益埋佢！」。不過事隔不到三個鐘當事人已經跳出嚟承認，原來就係馬天佑。睇返佢IG的確話自己去咗馬來西亞參加友人婚禮，仲有俾返Credit指明西裝係出自Eric公司。馬天佑回應時就話：「我喺公司試嘅時候，冇問清楚西裝係點借返嚟就攞咗出trip。不過點講都好，咁樣做係好唔啱，我喺呢度衷心同Eric道歉，亦都已經同同事講咗，唔可以再有同樣嘅事發生，今次件事真係好對唔住，我會再親自同Eric道歉。」
馬天佑上載到吉隆坡參加婚禮嘅造型照，仲寫明身上燕尾服來自孫耀威嘅禮服公司。（馬天佑Facebook）
+6