麥明詩（Louisa）昨日（10日）晚上出席DSE放榜打氣活動，鼓勵一眾學生唔好畀太大壓力自己。作為高材生嘅Louisa唔好睇佢讀書咁叻，就以為佢當年放榜唔緊張，Louisa憶起當年：「我明白大家都好緊張，當年我都係，尤其係DSE得一個考試，唔同我哋當年有兩次（會考同高考）可能都會分擔到少少壓力。」

Louisa更呼籲一眾學生唔好同別人比較：「其實去到某個位同人比較係唔會開心，可能好多人都覺得我好幸運可以考到好成績啦，但我都會覺得自己未夠好，要欣賞自己好處，唔好同人比較，咁會令自己繼續開心，自己都會有優勝之處。」Louisa指最重要克服自己嘅短處。

《香港小姐2018》已經開始進行次輪面試，身為師姐嘅Louisa都有留意今屆質素：「我聽講今屆有馮盈盈師妹，我都開始同佢哋年紀有少少距離啦，我都見到好多都好高質素，希望可以同佢哋有啲交流。」Louisa講到已經同《後生仔傾下偈》嘅節目製作反應想搵佢哋做嘉賓，相信到時候會擦出更多火花。

早前Louisa就家中直播時候不慎走光，Louisa覺得本身係一件小事：「其實個時候條片都睇得唔清楚，大家都唔好想太多，我會繼續一貫自己原則，希望好似一個正常人生活，唔會因為份工影響個人習慣。」不過Louisa經過今次事件後，都話會做D嘢預防同類事情再發生：「下次會將影片質素調低，令到大家睇得唔清楚。」