又有一個港產男神威出國際！身高189cm的23歲劉寶業（Vincent）早前代表香港出戰全球先生選舉（Mister Global），於上月22日在曼谷舉行的決賽中與40個國家的猛男爭奪冠軍頭銜。雖然「全球先生」稱號最後落入美國型男Dario Duque手中，但Vincent都已經非常叻仔，擠身到最後十強，可算是已經為港爭光，而亞軍、季軍和殿軍分別由埃及的Ahmed Lasheen、波蘭的Jakub Kucner和南非的Dwayne Geldenhuis奪得。

Vincent原來是喇沙仔　兩個月激減近20磅

其實除了為香港爭一口氣，Vincent亦為母校爭光，現時是浸會大學學生的他其實之前曾就讀喇沙書院，絕對是正宗喇沙仔！雖然他本身亦是模特兒（主要拍平面廣告）兼籃球員（代表浸大出賽），應該不用大操特操都已經Fit爆，但賽前他都特登進行地獄式訓練，用77日的時間，將體重由195磅減到178磅，脂肪比例更低至12%，成條人魚線出晒嚟，非常犀利。他在社交網站中就指自己參賽是為了好好挑戰一次自己。

模特兒女友曾參加選美　經常曬合照閃盲人

雖然Vincent非常完美，但對一眾姊妹來說他有一大缺點，便是他原來已經有女朋友，而且其女友更是靚到飛起的27歲模特兒歐陽綺雯（Christy）。Christy和Vincent經常在網上放閃，除了合照之外，Vincent亦好時常為Christy影「男友視覺」相片，真的令人羨慕。其實Christy亦參加過ViuTV選美真人騷《美選D.n.A》，當時身為「天使組挑戰者」的她便在復活賽中被淘汰。