由朱晨麗 (Rebecca) 首次擔正做女一主演的無綫劇《特技人》昨晚播出的一集，最大的亮點當然就是Rebecca身穿性感比堅尼打沙灘排球的一場戲啦，就連她自己都話呢場戲入面的衣着打扮，仲sexy過她當年選港姐的水着look。其實自去年的無綫節目劇集巡禮入面播出了呢場戲的片段，已經令觀眾同網民都非常期待，尤其有一幕正面影住Rebecca俯身蹲下的鏡頭，盡顯她豐滿的上圍，足以令人睇到噴血。不過，當昨晚播出呢場戲時，呢個咁誘人的鏡頭竟然被刪走了，有網民即大表不滿，又叫Rebecca還返呢個鏡頭給他們。

對此，今日出席該劇宣傳的Rebecca表示：「我噚晚有睇呀，係公司決定嘅，之前有講過公司有個政策禁止一啲太性感嘅鏡頭。我都係出街先知cut咗，嗰場戲拍得好辛苦，結果cut咗當然有失望，其實自己都好想睇返播出嚟個效果，依家唯有睇返幅圖啦。(會點補償？) 留返畀Shaun (譚俊彥) 補償，佢應承咗。(大家想睇你，你着返呢套衫出嚟？) 唔會喇，我唔會着喇，呢場打沙灘排球戲已經係我極限嚟，真係好少布，條褲好高叉，完全打唔到底，女仔最驚走光㗎嘛。」

Rebecca又重提當日拍攝呢場戲時有多尷尬，她還嘗試過為自己爭取換戲服：「我拍之前一晚問服裝姐姐套衫係點嘅，發現原來咁少布，嗰晚我打咗好多電話，打咗畀導演、監製同編審，問係咪真係無第二件衫喇？佢哋話真正沙灘排球係咁着㗎，咁無辦法啦。我好細膽㗎，連見到曱甴都驚，但作為演員好多嘢都要頂硬上，要靠自己去完成。（接唔接受到更性感嘅演出？）無諗過，我唔係走性感路線，同埋有公司個政策應該唔會有咁嘅情況，今次呢場戲當係回憶啦。（收視40點再重演一次？）40點？你話天氣呀？睇下點啦，有得傾嘅。」