楊千嬅丁子高結婚9周年　訂製蛋糕大大紮紅玫瑰丁太超冧

結婚9周年又名「柳婚」，意思係「像垂楊擺柳，風吹雨打不能折」，經過7年之癢，習慣平淡嘅婚姻生活，享受細水長流嘅幸福。2009年，拍拖2年嘅楊千嬅丁子高喺美國拉斯維加斯註冊結婚，眨下眼已經9年，丁生喺結婚周年呢日，特意安排浪漫晚餐撐檯腳，送上紅玫瑰俾老婆，令千嬅笑逐顏開。

8月11號係楊千嬅丁子高柳婚之喜，當年佢地喺美國賭城秘密註冊結婚，2012年誕下仔仔Torres後，自始去到邊都一家三口癡到實。不過丁生都相當識做，結婚周年當然安排二人世界啦，丁生丁太著上黑色情侶裝，蹺住手頭貼頭相當溫馨。粉紅色蛋糕配上一對愛情鳥，大大紮紅色玫瑰氹得丁太相當開心。千嬅轉載老公個post留言寫上：「咬著唇邊，穿起婚紗上路……延續著這種相愛到白鬢。我們9」以歌詞表達愛意。