勤力媽媽羅霖入院做手術 趕兩日內出院：聽日要到深圳工作
撰文：洪曉璇
出版：更新：
羅霖尋日下晝出席開幕活動，估唔到完騷後馬上入院做手術。（羅霖Facebook）
打工仔受到勞工法例保障，享有例假年假病假保障，但藝人就唔同啦，有咩閃失受傷，演出機會就會流走，甚至手停口停。美魔女羅霖呢日上載兩張病床上嘅相，透露自己入院做小手術。Candy接受香港01訪問時，就話：「會要求醫生今日俾我出院，因為聽日仲要去深圳工作。」為咗養三個囝囝Candy真係頂硬上呀﹗
Candy上載病榻上照片，最安慰係囝囝留院陪過夜，令佢覺得相當窩心。（羅霖Facebook）
Candy於網上留言話：「感恩有媽咪和兒子的陪伴！身體健康最重要！」佢接受香港01訪問時進一步透露病情：「入院做個切除粉瘤小手術，喺大腿內側。大約一個月前沖涼時發現，仲愈來愈大好似合桃一樣。為咗唔影響工作，同醫生夾好時間尋日出席完活動就入院，希望醫生今日俾我出院因為聽日要上深圳工作。（唔停工休息？）食止痛藥頂硬上啦﹗最安慰係細仔Jonathan陪我過夜，會令自己盡快康復令佢地唔使擔心。」
平時出席活動Candy愛以短裙示人，做完手術可能要收埋美腿一段時間啦。（羅霖Facebook）
+8