鍾舒漫表演出意外被迫清唱跳舞　張敬軒容祖兒大讚：好鬼叻吖

依家時下年青人個個捧韓團，大讚歌精舞勁，但其實香港都有好歌手，只係大家望得太遠而忽略咗﹗Sherman鍾舒漫一出道跳唱歌手形象已經深入民心，仲係少數今時今日出騷有舞蹈員傍住一齊表演嘅香港歌手。早兩日佢喺西貢出席活動時突然發生意外冇咗音樂，不過Sherman臨危不亂，同兩位dancer繼續唱繼續跳，台下觀眾見到都拍晒手歡呼。

Sherman當日要演唱三首歌，唱到其中一首快歌《小碎步》時，突然發生意外冇咗音樂，不過Sherman臨危不亂，同兩位dancer繼續唱繼續跳，台下觀眾見到都拍晒手歡呼。去到中段Sherman嘅跳舞老師仲幫手玩beatbox，之後同場表演嘉賓之一ToNick鼓手晨㬢都加入打鼓救場，睇到台下觀眾勁hyper。

表演完結當晚，Sherman就將呢段小插曲擺咗上IG，點知引嚟同門師兄張敬軒表揚，軒仔喺自己IG repost咗後，仲寫咗段字讚Sherma叻叻豬，仲提到唱快歌遇到呢啲情況係特別唔容易：「呢啲係天份，亦係無數努力次排練嘅成果，好鬼叻吖」。而師姐容祖兒亦都留言：「這就是勤有功，叻叻sher sher」。KingJer都忍唔住喺Facebook出post，大讚Sherman專業：「其實香港樂壇主力做快歌嘅跳唱歌手真係買少見少，Sherman呢幾年一直堅持做快歌，今次 show到跳唱歌手同dancers嘅專業，掌聲比Sherman、兩位dancers同救場人員。」

今次發生呢段小插曲，Sherman就話：「突然間冇咗音樂，我第一個反應就係使唔使重新嚟過，但係我身體嘅感覺係要繼續去、the show must go on咁嘅感覺。當我一路跳嘅時候，我聽到我嘅排舞老師Rock sir突然間嘅beat box，都加咗度力俾我，我更加覺得唔好俾佢停，我覺得好團結，之後仲加埋ToNick鼓手晨曦突然間打起鼓，嘩！我哋喺台上面團火再大好多！就算音樂停咗，我哋都盡力完成呢個心，我喺台上面都好feel到，係team work、好團結。」

得到軒仔、祖兒同瓊姐「加持」，Sherman話完全冇諗過：「我post出嚟純粹想多謝排舞老師rock sir、dancers同晨曦個個都咁專業、咁配合。我淨係覺得每一場有咩事都要盡力做，最緊要係enjoy個show同埋我好感受到好多愛，包括排舞老師Rick sir嘅beat box，同埋晨曦上咗嚟，台下觀眾又俾support，雖然係意外，但係現場我好感覺到，我喺台上面都做得好開心、好投入。」