徐熙娣 (小S) 言行一向大膽出位，近日她應品牌之邀到了巴黎時裝周睇騷，與不少來自各地的名人影星同場，個個都打扮都靚靚又時尚，要在一眾潮人靚人當中突圍而出真係唔容易。不過就難唔到小S喇，她於當地時間昨日欣賞最後一場時裝騷的時候，終於出招瘋狂搶Fo！小S穿上了一件鑲滿寶石的露背露腰透視裝上陣，身材線條盡現，但最出位的是她下身所穿着的一條小三角褲，無論剪裁同款式都十足一條內褲咁樣。

小S呢身Hot到爆的打扮令她輕易成為全場焦點，即使當地氣溫只有十零度，都無阻她要露兩手的決心，寒風下依然一臉自信展現她迷人的body。途人都紛紛向她舉起手機或相機影相，再加現場不少紛絲的尖叫，就連外國攝影師都忍唔住邊影邊大讚小S：「So sexy！」。小S睇完騷仲拍片表示好開心有粉絲支持，笑言：「粉絲們的尖叫令外國攝影師以為我是亞洲最紅的明星，所以不得不影我。」而她今次呢身打扮完全是跟足設計師的原裝design，靚唔靚就見人見智喇。