孫耀威自爆鍾意新鮮感　唔擔心婚姻過期：真嘅愛情經得起時間考驗

日前孫耀威(Eric)作客TVB娛樂新聞台節目《StarTalk》，接受主播許文軒(Edmond)專訪，大談首度於香港舉行大型演唱會感受。Eric說：「今次演唱會我有一Part會喪跳，因為喺台灣出道時，每張唱片嘅主打歌都係快歌，希望將呢啲回憶帶返嚟。除此之外，以前一年有一半時間都喺日本宣傳，嗰段時間對我嚟講係好深刻，之後我喺香港，甚至台灣都好少唱日文歌，今次我會特登揀返啲日文歌嚟唱。」

當講到到婚姻時，Eric坦言：「好似搭飛機臨飛之前，我唔會吝嗇打電話同發短訊俾太太同埋屋企人，話比佢哋知我有幾愛佢哋。結咗婚之後，我學識中庸嘅態度，以前我比較我行我素，不過性格仍然好急，因為個腦不停轉，去旅行一定要去城市，要Shopping，玩晒最新嘅嘢，之前同屋企人去Resort旅行，我最後都忍唔住幫陳慧琳作咗首歌詞，我個人真係要有新鮮感同埋刺激。」

既然要有新鮮感，如何保鮮婚姻？Eric直言：「呢個係一個好好嘅問題，我都想知，真正嘅愛情會得到時間考驗，當冇新鮮感，就要認真諗下係咪出現咗問題，我同太太都好癲，佢同我一樣都鍾意玩，一啲好無聊嘅嘢都可以笑一餐，所以我哋都唔擔心，應該可以保持到呢份新鮮感。」